لفظوں کے افق پر ایک تازہ مگر گہرا رنگ چھوڑنے والا نام محمد ہشام علی ہاشمی جن کا تعلق پنجاب کے مہکتے ہوئے علمی و ادبی خطے جھنگ صدر سے ہے، اور اب دلِ پاکستان لاہور کو اپنا مسکن بنا چکے ہیں۔ جہاں ایک طرف وہ آئی ٹی ڈیپارٹمنٹ میں اپنی پیشہ ورانہ خدمات سرانجام دے رہے ہیں، وہیں دوسری جانب ان کا دل ادب کے دریچوں سے جھانکنے، دکھوں کو لفظوں میں ڈھالنے اور احساس کو صفحۂ قرطاس پر بکھیرنے میں مصروف رہتا ہے۔

ادب سے ان کی سنجیدہ وابستگی کا آغاز 2024-25 میں ہوا، لیکن ان کی تحریروں میں چھپے درد، سچائی اور شعور کی گہرائی کسی پختہ کار تخلیق کار کی جھلک پیش کرتی ہے۔ افسانہ، ناول، افسانچہ یا شاعری ہر صنف میں ان کی طبع آزمائی ایک ایسے مشاہدہ شناس دل کی گواہی دیتی ہے جو نہ صرف محسوس کرتا ہے بلکہ اُسے صفحے پر ایک نئی زندگی بھی دیتا ہے۔

فلسطین و غزہ کا دکھ ان کے لہو میں گھلا ہوا ہے۔ ان کی بیشتر تخلیقات انہی مظلوم فضاؤں کی بازگشت لیے ہوئے ہوتی ہیں، جہاں اذیتیں روزِ اول سے آباد ہیں، اور بچپن صرف تصویروں میں مسکراتا ہے۔ وہ لکھتے نہیں، گویا دنیا کے ضمیر کو جھنجھوڑتے ہیں۔ سوال بھی، دعا بھی ہے اور ایک دائمی احتجاج بھی۔

اب تک ان کے قلم کی خوشبو کئی انتھولوجیز، ادبی جرائد اور اخبارات کی فضا کو معطر کر چکی ہے، اور ان شاءاللہ، جلد ہی ان کی تحریریں کتابی صورت میں قارئین کے دل و ذہن کو چھو لینے کے لیے منظرِ عام پر آئیں گی۔